TIEDOTE |

DIEĐÁHUS: Ođđa davvisámegielat biibbaljorgalus almmuhuvvo digihámis

DIEĐÁHUS 4.2.2019
Suoma Biibbalsearvi

Sápmelaččat ávvudit álbmotbeaivvi 6.2.
Ođđa davvisámegielat biibbaljorgalus almmuhuvvo digihámis

Ođđa davvisámegielat biibbaljorgalus almmustuvvá Sámi álbmotbeaivve 6.2.2019. Jorgalus almmustuvvá neahttasiiddus Raamattu.fi sihke Piplia-áppas. Sihke neahttasiidu ja Piplia-áppa leat jorgaluvvon davvisámegillii. Davvisámegielat jorgalussii rahppojuvvo maiddái iežas čujuhus: Biibbal.fi. Boahtte geasi jorgalus almmustuvvá girjin ja dalle lágiduvvojit davviriikalaš ávvodoalut Norggas ja Suomas.

Suoma Girku alimus čoahkkin dohkkehii davvisámegielat biibbaljorgalusa skábmamánus 2018.

Jorgalusa váikkuhus

Jagis 2019 ávvuduvvo Ovttastuvvan Našuvnnaid eamiálbmotgielaid jagi. Sápmelaččat leat Suoma ja olles Eurohpá Uniovnna áidna eamiálbmot.

Ipmilbálvalusaid lassin ođđa biibbaljorgalus doarju sámiid vuoiŋŋalaš eallima ja girkostallama ovddideami ja sieludikšunbarggu. Dat rahpá Biibbala sisdoaluid maiddái rihppaskuvla- ja skuvlabarggus, daningo ovddit jorgalus lei nuoraide váttis ipmirdit. Jorgalusas lea mearkkašupmi maiddái sápmelaš identitehta nannemis.

– Biibbaljorgalusas lea duođaid stuorra mearkkašupmi. Dál mii beassat lohkat olles Biibbala dálá sámegillii. Biibbala oahpahus guoskkaha áibbas eará láhkai, go beassá lohkat Ipmila árpmus ja ráhkisvuođas iežas eatnigillii, dovdduidis gielain. Biibbala oahpahusat šaddet lagažin, dadjá sámebarggučálli, árvvoštallanjoavkku ságadoalli Erva Niittyvuopio.

Davviriikalaš ovttasbarggu boađus

Ođđa davvisámegielat biibbaljorgalus lea máŋggalotjahkásaš barggu buvtta. Dát lea ovttasbargu, man leat jođihan Norgga ja Suoma Biibbalsearvvit ovttas Ruoŧa Biibbalservviin. Jagi 1998 Ođđa testameanttas buvttaduvvui ođđa, dárkkistuvvon veršuvdna ja Boares testameanta jorgaluvvui ollásit ođđasit. Ovddit Boares testameantta jorgalus lea jagis 1895.

Fitnu prošeakta- ja jorgalanbargojoavkkus leat leamašan mielde gielladiehtaga, teologiija ja sámi vuoiŋŋalaš eallima áššedovdit. Jorgalanbarggu gielladieđalaš jođiheaddjin lea leamašan Oulu universitehta Giellagas-instituhta emeritushoavda, FT Tuomas Magga, gean ovddasvástádussan lei fuolahit, ahte jorgalus livččii áddehahtti buot davvisámegielagiidda, orrunguovllus fuolakeahttá. Seammás šattai vuosttas govvádus iešguđege guovlluid giela ráhkadusain, go dán rádjai lea leamašan fal oktasaš ortografiija.

Jorgalusa giella lea heivehuvvon sápmelaš duovdagiidda, vai lohkkái lea álkit áddet man birra lea sáhka.

Eatnigiella lea dovddu giella

Sámegielat árvvoštallanjoavkku lahttu Helga West beasai addit máhcahaga Boares testameantta válljejuvvon girjjiin ja árvvoštallat earret eará daid giela ja áddehahttivuođa.

”In lean ráhkkanan dasa, makkár dovddut badjánit go lohkagohten sivdnidanmuitalusa iežan eatnigillii. Njuorrasin, daningo lean dán rádjai nuorra teologan ja risttalažžan lohkan Biibbala dušše suoma- ja eaŋgasgillii, maid kultuvrraid in ane iežan kultuvran. Oaidnigohten máŋggaid teavsttaid áibba eará láhkai, iežan vuolggasajis. Easka dál Biibbal hállá maiddái munnje”, govvida West lohkama ja árvvoštallanbarggu álgomuttuid.

Almmustahttindoalut geassit

Davvisámegielat Biibbala davviriikalaš atnuiváldindoaluid ávvudit boahtte geasi 23.–25.8.2019 Norgga bealde Guovdageainnus ja Suoma bealde Ohcejogas 1.9.2019. Suoma evangelalaš-luteralaš girku váldá jorgalusa atnui girkus 1.9.2019.

Biibbal davvisámegillii
www.biibbal.fi | www.raamattu.fi
Luđe Piplia-áppa: GooglePlay tai AppleStore

——————

Lassidieđut, Suoma Biibbalsearvi:

Markku Kotila, doaimmajođiheaddji, tel. 010 838 6512, markku.kotila@piplia.fi
Terhi Huovari, gulahallan- ja ruhtačoagginjođiheaddji, tel. 040 546 9016, terhi.huovari@piplia.fi

Raamattu.fi-bálvalusa ovddideapmi
Antti Siukonen, searvegoddebálvalusa jođiheaddji, tel. 040 517 8010, antti.siukonen@piplia.fi

www.piplia.fi

Govvamateriála
www.piplia.fi/materiaalit

Suoma Biibbalsearvi bargá dan ovdii, ahte olbmuid olahit sin iežaset gielain. Searvi jorgala ja goasttida Biibbala, boktala beroštumi sáni ektui ja ovddida barggus bokte lohkandáiddu ja duvdá sin geat leat eallimis govssahallan.